答大偉先輩(se̋n-pái)幾種𨑨迌物仔

 1.『陀螺』：「干樂(kan-lo̍k)」，澎湖媽宮另外有講「柴佛(tshâ-pu̍t)」。

2.『竹蜻蜓』：「竹田嬰(tik-tshân-inn/enn/ni/ne)」，鹿港說做「飛鼠(per-tshír)」，「田嬰」个次字，有个人會受著頭字「田(tshân)」韻尾「-n」个影響，順向「同化」做「tshân-ni/ne」，阮鹿港就是說「tshân-ni」；另外，臺北个泉腔夭閣有共「田嬰」讀做「iân-mi // iam-mi」。

3.『跳繩』：「跳索仔(thiàu-soh-á)。

4.『踢毽子』：在來講【踢毽 that-kiàn】、【㧒毽 hiat-kiàn】、【孽毽 gia̍t-kiàn】、【踢錢仔 that tsînn-á】，現代有个綴華講做【踢毽子 that kiàn-tsí】，宜蘭講做【踢雞毛踢仔 that ke-môo-that-á】。

5.『布袋戲偶』：普通腔「布袋戲尪仔(pòo-tē/tēr-hì-ang-á)」，老泉腔說「布袋戲人仔(pòo-tēr-hì-lâng-á)」。

6.『踩高蹺』：「踏蹺(ta̍h-khiau)」，臺南kap媽宮另外有講「踏跤蹺(ta̍h-kha-khiau)」，鹿港是講「接跤(tsiap-kha)」、「行柴跤(kiânn-tshâ-kha)」。

7.『跳格子』：「跳跤雞(thiàu-kha-kere/kue/ke)」、「趒(tiô)跤雞」、「趒跤khôo」、「蹌(tshiáng/tshíng)跤雞」、「跳年(thiàu-nî)」，阮鹿港說「踢空(that-khòng)」。2015.08.30調查幾位福建人的說法，泉州鯉城徐楓：「跳孔(kháng)」，泉州東石蕭華國：「tshiáng/tshíng?-phong」，泉州晉江阿郎：「跳拼(phing)」，漳州東山何偉：「趒科(tiô-khue)」、「tshiāng公廳」。《廈英》記泉州說做「tshiáng-koo-le」。

8.『七巧板』：「七巧圖(tshit-khiáu/kháu-tôo)」、「七竅圖(tshit-khiàu-tôo)」。

a.《台日典》共「趒跤雞」个「趒」閣記一音送氣个「thiô」；另外夭閣有記「趒跤khôo」，即字「khôo」伊漢字寫做「雞」。

b.《常用詞辭典》記个「蹌(tshíng)跤雞」，即字「tshíng」个漢字無的確是「筅」。

c.感謝陳文傑老師相添(sann-thinn)宜蘭个『踢毽子』號做「踢雞毛踢仔(that-ke-môo-that-á)」。

d.感謝杜建坊先生補充伊佇鹿港調查个『竹蜻蜓』叫做「飛鼠(per-tshír)」；亻因臺北人共「田嬰」讀做「tshân-ni // iam-mi」。

e.感謝洪錦田先生補充鹿港人个講法，『竹蜻蜓』-「飛鼠(per-tshír)」、「tshân-ni」、「踏跤蹺」-「行柴跤(kiânn-tshâ-kha)」。