『針眼』ê臺語

 以下是我調查 ê 一寡記錄：

1.阮鹿港確實是說【生目尖(tsiam)】、毋但張屏生教授 ê 調查，今仔日我有閣共六个鹿港人確認（包括阮老爸，𪜶个鹿港話計會用得信用--得，四个70歲以上，兩个卜倚50歲），當然【針】是讀「tsam」；另外，計無人聽過【ba̍k-káu-tsiam/tsam】。

2.金門人劉秀雪教授說【生目尖(tsiam)】、【針 tsam】，毋捌聽過【ba̍k-káu-tsiam/tsam】。

3.汐止人林金城先生說【生目尖(tsiam)】、【針 tsam】，毋捌聽過【ba̍k-káu-tsiam/tsam】。

4.同安人紀榮浩閣有𪜶阿媽(90歲)說【生目尖(tsiam)】、【針 tsam】，毋捌聽過【ba̍k-káu-tsiam/tsam】。

5.毋拄問三个泉州人（鯉城、晉江、東石），煞計是【生目針(tsam)】，三人計毋捌聽過【ba̍k-káu-tsiam/tsam】。《閩南方言大詞典》也是記【目针】 〈厦漳台〉bak8-5tsiam1〈泉〉bak8-4tsam1 ＝〖目狗针〗〈台〉—kau3-1tsiam1‖〈漳〉又说〖狗针〗kau3-1tsiam1。

6.林建輝先生漳北白水【生屎針】，無聽過【ba̍k-káu-tsiam/tsam】。

7.兩个漳北海滄人計說【生目針】，無聽過【ba̍k-káu-tsiam/tsam】。

結論：獨獨鯉城、晉江、東石以及《閩南方言大詞典》〈泉〉（語料來源是鯉城 ê 王建設先生）說【生目針(tsam)】，同安、鹿港、金門、汐止有共【針】讀做「tsam」ê 泉同腔，計是【生目尖(tsiam)】，而且計無說【ba̍k-káu-tsiam/tsam】。

【ba̍k-káu-tsiam】拍算是部份（臺灣）漳腔 ê 特徵詞。